Familjusamrøður

Í arbeiðinum verður dentur lagdur á at arbeiða við familjum, tí at trupulleikar við rúsnýtslu ávirka ikki einans tann, ið rúsar seg, men eisini tey rundanum. Tí bjóða vit familjusamrøður.

Familjusamrøður

Vit arbeiða familjuorienterað, sum m.a. merkir, at vit bjóða familjum, sum hava tørv á tí, samrøður. Tað kunnu vera nógvar orsakir til, at ein familja vil hava familjusamrøður. Eitt tað vanligasta er, at familjan hevur trupult við at tosa saman um tað, sum fylgir einum rústrupulleika. Familjusamrøður kunnu eisini verða hjálpsamar, um familjan hevur upplivað onkra ávísa hending ella eitt tíðarskeið, sum hevur verið serliga trupult. Tá kunnu tey hava tørv á hjálp til at seta orð á sínar tankar og kenslur um støðuna. 

Tekning: Katrine Quorning

Til samrøðurnar verður serliga hugsað um børnini og tey ungu. Endamálið við, at tit í familjuni sita saman er eisini, at tit hoyra hvønn annan. Í teimum førum, har ein avvarðandi hevur tørv á nøkrum stuðlandi samrøðum einsamallur, er hetta eisini møguligt.

Familjusamrøður í sambandi við bólk

Familjurnar hjá teimum 8-17 ára gomlu, sum ganga í bólk, verða altíð bodnar inn til eina samrøðu, áðrenn byrjað verður í bólki. 

Endamálið er, at børn og foreldur koma inn at síggja hølini hjá okkum og at møta okkum, sum starvast her. Harumframt er endamálið, at vit bólkaleiðarar fáa innlit í familjuna – bæði hvat tey takast við dagliga, og hvussu rúsurin fyllir ella hevur fylt heima. Eftir hetta kunnu børnini byrja í bólki. 

Familjan verður eisini bjóðað til eina eftirmetingarsamrøðu, tá ið bólkarnir enda. Her verður m.a. tosað um, hvussu tað hevur verið hjá børnunum at vera í bólki, og um børnini vilja halda áfram. Ímillum byrjanar- og eftirmetingarsamrøðuna, verða foreldur ella familjan boðin inn til samrøðu eftir tørvi.

Tilboðini

Øll tilboðini hjá Títt Rúm eru ókeypis. Tað krevst eingin ávísing (t.d. frá lækna), fyri at luttaka í tilboðnum. Einki krav er um, at tann við rústrupulleikum skal hava verið í viðgerð. Hevur viðkomandi verið í viðgerð, er einki krav um, hvar viðgerðin skal vera farin fram.

Tilboðið er fyri allar familjur, sum hava – ella hava havt – rústrupulleikar heima. Hetta merkir til dømis, at ein kann eisini melda seg til, hóast annað av foreldrunum t.d. ikki hevur rúsað seg í longri tíð. Nógv uppliva, at rústrupulleikin er burtur, men at avleiðingarnar og tann neiliga ávirkanin á familjuna og tey sjálv sita eftir.

Samstarv við Blákrossheimið

Tá ein persónur kemur í døgnviðgerð á Blákrossheiminum, fáa tey avvarðandi hjá viðkomandi møguleika fyri samrøðum. Blákrossheimið veitir eisini viðgerð fyri avvarðandi, har tann ið hevur rúsnýtsluórógvina ikki er í døgnviðgerð. Hetta er ein ambulant bólkaviðgerð, ið er skipað eftir DAT-leistinum (https://www.blakrossheimid.fo/dat/). Her møtir ein í bólki saman við øðrum avvarðandi einaferð um vikuna í tveir tímar hvørjaferð. Aldursmarkið er 18 ár.